پلو کائڻ جي خواهش واري ڳالهه ۽ ٻيو پاراتو!

پلو کائڻ جي خواهش واري ڳالهه ۽ ٻيو پاراتو!
شاديءَ کان پوءِ شاهه سائينءَ جي گهر اميدواري ٿي. بي بي صاحبه پلي جي خواهش ڏيکاري. پلي جي مند هئي پر ان جي ابتدا يا پڇاڙيءَ جا ڏينهن هوندا، جو پلو مشڪل سان مليو. هي واقعو ڀٽ تي رهائش وارن ڏينهن جو ٿي نه ٿو سگهي ڇو ته شاهه سائين گهڻو دير سان ڪوٽڙي مغل مان لڏيو. درياهه گهڻو پري نه هو جو ان جو لنگهه هالاڪنڊي وٽان هو. تنهن هوندي به فقير کي گرميءَ ۾ پنڌ ڪرڻو پيو هوندو جو سهڪندو موٽيو. هي واقعو امڪاني طرح شاهه سائينءَ جي شاديءَ کان هڪ يا ٻه سال پوءِ 1715 يا 1716ع جو ٿي سگهي ٿو. جڏهن شاهه سائينءَ فقير کي سهڪندي ڏٺو ته ضرور پڇيو هوندو ته ڪٿان پيو اچي؟ ۽ فقير ضرور ٻڌايو هوندو ته بي بي صاحبه هيءَ فرمائش ڪئي هئي. شاهه صاحب کي اها ڳالهه واقعي پسند نه آئي هوندي ته ويچارا فقير فرمائشون پوريون ڪرڻ ۾ هلاڪ آهن. ٿي سگهي ٿو ته شاهه سائينءَ ايئن به چيو هجي ته ”ٻار اڃا ڄائو ئي نه آهي ته فقيرن کي رلايو اٿس، ڄمندو ته ڪهڙا ڪلور ڪندو!“ پر ساڳئي جملي جو ٻيو حصو ته ”اهڙو اولاد کپي ئي ڪونه!“ اضافي جملو آهي. ممڪن آهي ته بعد ۾ جڏهن ٻار پيٽ ۾ سڪي ويو ته ڪنهن عقيدتمند اهو اضافو ڪري ڇڏيو هجي ۽ ان کي شاهه سائينءَ جي ڪرامت قرار ڏنو ويو. پنهنجي ئي گهر جي ڀاتين کي پاراتو ڏيڻ هڪ غير رواجي ڳالهه آهي ۽ شاهه صاحب جي مزاج موجب نه آهي ۽ ڳالهه جو اهو حصو پڪ سان هٿ جو جوڙيل آهي. البت اهو واقعو ٿيو، ۽ پوءِ ٻار نه ٿيو.
ساڳي طرح پاراتي جو هڪ ٻيو واقعو به روايتن ۾ شامل آهي ته ”بي بي صاحبه هڪ ڏينهن گهر جي ٻڍڙي فقيرياڻيءَ تي سخت ڪاوڙي جو مسڪين فقيرياڻيءَ کي ڏاڍي ڏکي لڳي. سو، شاهه سائينءَ بي بي صاحبه کي فرمايو ته اوهان کي جا ٻار سرجڻ جي سرهائي سپجي آهي، انڪري بي پرواهي پيدا ٿي آهي ڇا جو فقيرياڻين کي رنجائڻ کان به نٿا رهو؟ مون کي اميد نه اهي ته اهو خوشيءَ جو ڪارڻ اوهان کي ڪڏهن به پيدا ٿيندو!“ پوءِ ٻار پيٽ ۾ سڪي ويو. هن واقعي ۾ به ساڳي ڪرامت جي ڳالهه ظاهر ڪرڻ جي ڪوشش ڪئي وئي آهي ته شاهه لطيف ’ڪاني ڪرامت‘ وارو بزرگ هو. واقعي جو پهريون حصو ٺيڪ هوندو، جو ايئن ٿي سگهي ٿو. شاهه سائينءَ جو ناراضپو ڏيکارڻ به واجبي آهي پر اهو چوڻ ته ”اوهان کي خوشيءَ جو ڪارڻ ڪڏهن به پيدا نه ٿيندو!“ هڪ اضافي جملو آهي ۽ گهر وارن کي پاراتو آهي يا وري ان ٻار کي پاراتو آهي جيڪو سرجيو ته آهي پر اڃا جنم نه ورتو اٿائين. اها ڳالهه شاهه سائينءَ تي تهمت مثل آهي.
تاج المخدرات (بي بي سعيده) شاهه صاحب جي حياتيءَ ۾ ئي گذاري وئي پر شاهه سائينءَ ٻي شادي نه ڪئي. اهڙي ڪا به تصديق موجود نه آهي ته بي بي صاحبه ڪهڙي سال ۾ يا شاديءَ کان ڪيترا سال پوءِ وفات ڪئي؟ بي بي صاحبه جي آخري آرامگاه ڀٽ تي شاهه سائينءَ جي روضي کان اولهه ۾ آهي. يعني بي بي صاحبه جو شاهه سائينءَ سان ساٿ 1742ع کان پوءِ تائين آهي. البت هوءَ شاهه سائينءَ کان اڳ لاڏاڻو ڪري وئي، يعني 1751ع کان اڳ. شاهه سائينءَ جي والده به ڀٽ تي آرامي آهي، يعني سندن والده جو سايو شاهه سائينءَ تي 1742ع کان پوءِ به ڪجهه وقت قائم هو.